टोन्बो इमेजिंग इंडिया लिमिटेड’चा आयपीओ गुरुवार, १५ ऑक्टोबर २०२६ रोजी खुला होणार आहे.

POSTED BY  : MRUNALI SAKPAL DATED ON  : 12/10/2027 (8850212023) 📞

• ‘टोन्बो इमेजिंग इंडिया लिमिटेड’च्या प्रत्येकी २ रुपये दर्शनी मूल्य असलेल्या समभागांचा किंमतपट्टा ६६५ ते ७०० रुपये असा निश्चित करण्यात आला आहे.
• अँकर गुंतवणूकदारांसाठी अर्ज करण्याची तारीख – बुधवार, १४ ऑक्टोबर २०२६.
• आयपीओ खुला होण्याची तारीख – गुरुवार, १५ ऑक्टोबर २०२६. आयपीओ बंद होण्याची तारीख – सोमवार, १९ ऑक्टोबर २०२६.
• गुंतवणूकदारांना किमान २१ समभागांसाठी अर्ज करता येईल. त्यानंतर २१ समभागांच्या पटीत अर्ज करता येईल.
• ‘आरएचपी’ची (रेड हेरिंग प्रॉस्पेक्टस) लिंक : https://live.jmfl.com/od/UploadedFiles/CA86AB52-0D43-437A-8D1C-6E475C6CEF01.pdf

राष्ट्रीय : (NHI24) टोन्बो इमेजिंग इंडिया लिमिटेड कंपनीचे प्रत्येकी २ रुपये दर्शनी मूल्य असलेले समभाग प्राथमिक सार्वजनिक प्रस्तावाद्वारे (आयपीओ) विक्रीसाठी आणले जाणार आहेत. हा आयपीओ गुरुवार, १५ ऑक्टोबर २०२६ रोजी खुला होईल. आयपीओ खुला होण्याच्या एक दिवस आधी, म्हणजे बुधवार, १४ ऑक्टोबर २०२६ रोजी अँकर गुंतवणूकदारांना बोली लावता येईल. आयपीओमध्ये अर्ज करण्याची अंतिम तारीख सोमवार, १९ ऑक्टोबर २०२६ आहे. गुंतवणूकदारांना किमान २१ समभागांसाठी अर्ज करता येईल. त्यानंतर २१ समभागांच्या पटीत अर्ज करता येईल.

या ‘आयपीओ’मध्ये केवळ विद्यमान समभागधारकांकडून समभागांची विक्री केली जाणार आहे. या विक्रीअंतर्गत प्रत्येकी २ रुपये दर्शनी मूल्य असलेले जास्तीत जास्त १,२१,७४,०४६ समभाग विक्रीसाठी उपलब्ध असतील.

टोन्बो इमेजिंग इंडिया लिमिटेड ही संरक्षण क्षेत्रातील इलेक्ट्रॉनिक उपकरणे बनवणारी बंगळुरूस्थित जागतिक कंपनी आहे. ही कंपनी पाळत ठेवणे, टेहळणी, लक्ष्य निश्चित करणे आणि नियंत्रण यांसाठी लागणाऱ्या यंत्रणा तयार करते. यासाठी ती सेन्सिंग, माहितीवर प्रक्रिया करणे, संदेशवहन आणि मार्गदर्शन यांसाठीच्या यंत्रणांची रचना करते, त्यांचा विकास करते आणि त्यांचे उत्पादन करते. कंपनीच्या उत्पादनांमध्ये थर्मल इमेजिंग कोअर, शस्त्रांवर बसवली जाणारी लक्ष्यदर्शक उपकरणे, हातात धरून वापरता येणारी थर्मल इमेजिंग दुर्बिणी, लक्ष्य निश्चित करणाऱ्या यंत्रणा, क्षेपणास्त्रांसाठी लक्ष्य शोधणारी उपकरणे आणि अग्निनियंत्रण यंत्रणा यांचा समावेश आहे. कंपनीच्या टॅक्टिकल सिस्टिम्स आणि प्लॅटफॉर्म सिस्टिम्स या विभागांद्वारे ही उत्पादने उपलब्ध करून दिली जातात. ड्रोनच्या मोठ्या समूहांचा सामना करण्यासाठी ही कंपनी निर्देशित ऊर्जा प्रणालीही विकसित करत आहे. ३० जून २०२६ पर्यंत ‘टोन्बो इमेजिंग’ने २४ देशांमध्ये २८,००० हून अधिक यंत्रणा कार्यान्वित केल्या होत्या.

‘टोन्बो इमेजिंग इंडिया लिमिटेड’चे प्रवर्तक अरविंद कोंडांगी लक्ष्मीकुमार आहेत. ते व्यवस्थापकीय संचालक व मुख्य कार्यकारी अधिकारी या पदांवर आहेत. त्यांच्यासह अंकित कुमार आणि सेसिलिया डिसूझा हे कंपनीचा कारभार सांभाळतात. ‘टोन्बो इमेजिंग’च्या उत्पादनांची रचना आणि विकास भारतातच केला जातो. त्यामुळे कंपनीच्या इलेक्ट्रो-ऑप्टिक्स आणि इन्फ्रारेड उत्पादनांवर अमेरिकेच्या आंतरराष्ट्रीय शस्त्र व्यापार नियमांचे (आयटीएआर) निर्बंध लागू होत नाहीत. २०२३-२४ या आर्थिक वर्षापासून कंपनीच्या उत्पादनांमध्ये वापरल्या जाणाऱ्या बौद्धिक संपदेची संपूर्ण मालकी कंपनीकडे आहे. ही कंपनी कमी मालमत्तेवर आधारित व्यवसाय (अॅसेट-लाइट) पद्धतीने काम करते. उत्पादनांची रचना, त्यांचे प्रारूप तयार करणे आणि चाचण्या घेणे ही कामे बंगळुरू येथील कंपनीच्या संशोधन व विकास केंद्रात केली जातात. मोठ्या प्रमाणावरील उत्पादनाचे काम मात्र इलेक्ट्रॉनिक उत्पादन क्षेत्रातील प्रमाणित भागीदारांकडून करून घेतले जाते.

या कंपनीचे समभाग बीएसई लिमिटेड आणि नॅशनल स्टॉक एक्स्चेंज ऑफ इंडिया लिमिटेड या शेअर बाजारांमध्ये सूचिबद्ध करण्याचा प्रस्ताव आहे.

या ‘आयपीओ’साठी जेएम फायनान्शियल लिमिटेड आणि आयआयएफएल कॅपिटल सर्व्हिसेस लिमिटेड या ‘बुक रनिंग लीड मॅनेजर्स’ म्हणून काम पाहणार आहेत.