NABVENTURES ने फंड II च्या पहिल्या क्लोजिंगमध्ये ₹450 कोटी उभारले; एकूण निधीचे लक्ष्य ₹1,500 कोटी निश्चित
Fund II मधील अँकर गुंतवणूकदार म्हणून नाबार्ड भारताच्या कृषी आणि ग्रामीण अर्थव्यवस्थेत नवोन्मेषाच्या माध्यमातून विकासाला चालना देण्याच्या आपल्या वचनबद्धतेचा पुनरुच्चार करत आहे.
POSTED BY : MRUNALI SAKPAL DATED ON : 09/10/2026 (8850212023) 📞
मुंबई (NHI24) : नॅशनल बँक फॉर ॲग्रिकल्चर अँड रुरल डेव्हलपमेंट (नाबार्ड) ची व्हेंचर कॅपिटल शाखा असलेल्या NABVENTURES ने NABVENTURES Fund II ची पहिली क्लोजिंग यशस्वीरीत्या पूर्ण केल्याची घोषणा केली आहे. या फंडासाठी ₹450 कोटींच्या गुंतवणुकीच्या वचनबद्धता प्राप्त झाल्या आहेत. यापूर्वीच्या फंडांच्या दमदार कामगिरीच्या पार्श्वभूमीवर, ज्यांनी एकत्रितपणे 23 नाविन्यपूर्ण उद्योगांना पाठबळ दिले आहे, या फंडाने ग्रीन-शू पर्यायासह एकूण ₹1,500 कोटींचा निधी उभारण्याचे लक्ष्य निश्चित केले आहे.
Fund II मधील अँकर गुंतवणूकदार म्हणून नाबार्ड भारताच्या कृषी आणि ग्रामीण अर्थव्यवस्थेत नवोन्मेषाच्या माध्यमातून विकासाला चालना देण्याच्या आपल्या वचनबद्धतेचा पुनरुच्चार करत आहे. हा फंड तंत्रज्ञान, विस्तारक्षम व्यवसाय मॉडेल्स आणि शाश्वत उपाययोजनांचा वापर करून कृषी मूल्यसाखळी आणि ग्रामीण बाजारपेठांमधील महत्त्वाच्या आव्हानांना सामोरे जाणाऱ्या आशादायी प्रारंभिक आणि विकासाच्या टप्प्यातील उद्योगांना पाठबळ देईल.पहिल्या क्लोजिंगची घोषणा करताना नाबार्ड चे अध्यक्ष डॉ. शाजी कृष्णन व्ही. म्हणाले: “NABVENTURES Fund II ची ₹450 कोटींची यशस्वी पहिली क्लोजिंग ही भारताच्या कृषी आणि ग्रामीण अर्थव्यवस्थेत नवोन्मेषाला चालना देण्याच्या नाबार्ड च्या सातत्यपूर्ण वचनबद्धतेतील एक महत्त्वाचा टप्पा आहे. या क्षेत्रात होत असलेल्या बदलांच्या पार्श्वभूमीवर, उत्पादकता वाढविणे, मूल्यसाखळ्या मजबूत करणे, शेतकऱ्यांचे उत्पन्न वाढविणे आणि सक्षम व लवचिक ग्रामीण उद्योग उभारणे यासाठी विस्तारक्षम आणि तंत्रज्ञानाधारित उपाययोजनांची गरज वाढत आहे.”
“Fund II च्या माध्यमातून, कृषी परिसंस्थेतील महत्त्वाच्या आव्हानांवर नाविन्यपूर्ण उपाय विकसित करणाऱ्या दूरदृष्टी असलेल्या उद्योजकांसोबत भागीदारी करण्याचे आमचे उद्दिष्ट आहे. शाश्वतता, हवामान बदलासंदर्भातील लवचिकता, आर्थिक समावेशन आणि रोजगार व उपजीविकेच्या संधींची निर्मिती यांसारख्या माध्यमातून भक्कम व्यावसायिक परिणामांसोबतच अर्थपूर्ण सामाजिक प्रभाव निर्माण करणाऱ्या उद्योगांना पाठबळ देण्यावर आमचा भर आहे.” “नाविन्यपूर्ण परिसंस्थेला अधिक बळकटी देत, भारताच्या कृषी आणि ग्रामीण अर्थव्यवस्थेतील परिवर्तनाला गती देण्याचे नाबार्डचे उद्दिष्ट आहे. यामुळे ही अर्थव्यवस्था अधिक लवचिक, स्पर्धात्मक आणि भविष्यातील गरजांसाठी सज्ज होईल.”
