CREDAI MCHI YOUTH NMR चा पुढाकार; सोसायटीधारकांना थेट संवाद, पारदर्शकता आणि तज्ज्ञांचे मार्गदर्शन मिळणार
नवी मुंबई आणि रायगड जिल्ह्यातील जुन्या गृहनिर्माण संस्थांच्या पुनर्विकास प्रक्रियेला गती मिळणार
POSTED BY : MRUNALI SAKPAL DT. 19/09/2026 📞 8850212023
मुंबई NHI24.COM – नवी मुंबई आणि रायगड जिल्ह्यातील जुन्या गृहनिर्माण संस्थांच्या पुनर्विकास प्रक्रियेला गती, पारदर्शकता आणि योग्य दिशा देण्यासाठी CREDAI MCHI YOUTH NMR तर्फे ‘Ease of Doing Redevelopment (EODR) 2.0’ या महत्त्वाकांक्षी उपक्रमाची घोषणा करण्यात आली आहे. वाढत्या शहरीकरणाच्या पार्श्वभूमीवर हजारो सोसायट्या पुनर्विकासाच्या उंबरठ्यावर असताना, मालमत्ता मालक आणि विकासक यांच्यात थेट संवाद घडवून आणणे हा या उपक्रमाचा मुख्य उद्देश आहे.
नवी मुंबईतील वाशी, नेरुळ, सानपाडा, बेलापूर, खारघर, कामोठे, कळंबोली आणि पनवेल या नोड्समध्ये १९८०-९० च्या दशकात CIDCO च्या माध्यमातून उभारण्यात आलेल्या शेकडो इमारती आज ३५ ते ४० वर्षे जुन्या झाल्या आहेत. पावसाळ्यात गळती, स्ट्रक्चरल ऑडिटमध्ये अनुत्तीर्ण, लिफ्टची समस्या आणि पार्किंगचा तुटवडा यामुळे नागरिक त्रस्त आहेत. मात्र पुनर्विकासाची प्रक्रिया – ७९अ अंतर्गत ठराव, विकासक निवड, RERA नोंदणी, भाडे करार आणि कॉर्पस फंड याबत अपुऱ्या माहितीमुळे अनेक सोसायट्यांचे प्रस्ताव वर्षानुवर्षे रखडले आहेत.
हीच दरी भरून काढण्यासाठी EODR 2.0 आयोजित करण्यात येत आहे. या उपक्रमात नवी मुंबईतील ४० हून अधिक नामांकित आणि MahaRERA नोंदणीकृत विकासक सहभागी होणार आहेत. तर १५०० हून अधिक गृहनिर्माण संस्थांचे चेअरमन, सेक्रेटरी आणि सदस्य या ठिकाणी भेट देऊन आपल्या सोसायटीच्या पुनर्विकासाबाबत चर्चा करणार आहेत, अशी माहिती आयोजकांनी दिली. विशेष म्हणजे केवळ नवी मुंबईच नव्हे, तर रायगड जिल्ह्यातील पेण, अलिबाग, उरण, पनवेल ग्रामीण आणि खोपोली परिसरातील सोसायट्यांनाही यामध्ये आमंत्रित करण्यात आले आहे.
थेट संवादावर भर
EODR 2.0 चे वैशिष्ट्य म्हणजे हा केवळ बिल्डरांचा एक्स्पो नाही, तर एक ज्ञान आणि संवादाचे व्यासपीठ असणार आहे. यादरम्यान दिवसभर विविध विषयांवर पॅनेल चर्चा होणार आहेत. ‘पुनर्विकासातील कायदेशीर अडचणी आणि उपाय’, ‘विकासक निवडताना घ्यावयाची काळजी – टेंडर प्रक्रिया ते बँक गॅरंटी’, ‘अतिरिक्त चटई क्षेत्र, भाडे आणि कॉर्पस फंडाचे गणित’ आणि ‘MahaRERA च्या नव्या मार्गदर्शक सूचना’ या विषयांवर तज्ज्ञ मार्गदर्शन करणार आहेत.
यामध्ये प्रसिद्ध आर्किटेक्ट, स्ट्रक्चरल इंजिनिअर, सहकार कायदे तज्ज्ञ वकील, MahaRERA सल्लागार आणि राष्ट्रीयकृत बँकांचे प्रतिनिधी सहभागी होऊन सोसायटीधारकांच्या प्रश्नांना उत्तरे देणार आहेत. प्रत्येक सोसायटीला आपली कागदपत्रे घेऊन येऊन थेट विकासकांशी वन-टू-वन मीटिंग घेता येणार आहे, ज्यामुळे मध्यस्थांशिवाय पारदर्शक चर्चा होईल.
CREDAI MCHI YOUTH NMR च्या पदाधिकाऱ्यांनी सांगितले, “EODR चा पहिला टप्पा गेल्या वर्षी यशस्वी झाला. अनेक सोसायट्यांना योग्य विकासक मिळाले. आता EODR 2.0 हा त्याचा अधिक व्यापक आणि पुढचा टप्पा आहे. आमचा उद्देश फक्त घरे बांधणे नाही, तर सोसायटीधारकांमध्ये विश्वास निर्माण करणे आहे. सोसायटीला योग्य माहिती मिळाली तरच पुनर्विकास घाईने नाही, तर योग्य पद्धतीने होईल.”
सोसायटीधारकांना काय फायदा?
या उपक्रमामुळे सामान्य फ्लॅटधारकाला एकाच ठिकाणी ४० हून अधिक पर्यायांची तुलना करता येणार आहे. कोणता विकासक किती अतिरिक्त जागा देतो, भाडे किती देतो, कॉर्पस फंड किती आणि बांधकामाचा कालावधी किती, हे सर्व समोरासमोर समजणार आहे. याशिवाय मोफत कायदेशीर सल्ला आणि जुन्या इमारतीचे स्ट्रक्चरल ऑडिट कसे करावे याबाबतही मार्गदर्शन मिळणार आहे.
नवी मुंबई महानगरपालिका आणि सिडको प्रशासनानेही जुन्या धोकादायक इमारतींच्या पुनर्विकासासाठी विशेष धोरण जाहीर केले असल्याने, EODR 2.0 ला अधिक महत्त्व प्राप्त झाले आहे. हा उपक्रम पुढील महिन्यात CIDCO Exhibition Centre, वाशी येथे होण्याची शक्यता असून, त्याची अंतिम तारीख आणि नोंदणी प्रक्रिया लवकरच जाहीर केली जाणार आहे. या उपक्रमामुळे नवी मुंबई आणि रायगडमधील रखडलेला पुनर्विकास वेगाने मार्गी लागेल, अशी अपेक्षा व्यक्त होत आहे.
EODR 2.0 ची वैशिष्ट्ये थोडक्यात : ४०+ विकासक, १५००+ सोसायट्या, थेट संवाद, पॅनेल चर्चा, मोफत तज्ज्ञ मार्गदर्शन आणि पारदर्शक पुनर्विकासावर भर.
