मोहिते ट्रॉफी शालेय कॅरम स्पर्धेत गौरी, नील, दैविक, आर्यनची विजयी सलामी 

POSTED BY MRUNALI SAKPAL ON DATED- 01/06/2026(9004379946)

Mumbai (NHI@24)  आयडियल स्पोर्ट्स अकॅडमी-ग्रुप व राष्ट्रीय मिल मजदूर संघ आयोजित अमृत महोत्सवी क्रीडापटू गोविंदराव मोहिते ट्रॉफी १६ वर्षाखालील शालेय मुलामुलींच्या विनाशुल्क कॅरम स्पर्धेत जे.व्ही. वाच्छा हायस्कूलची गौरी सावंत, पाटकर विद्यालय-डोंबिवलीचा नील म्हात्रे, शिंदेवाडी मुंबई पब्लिक स्कूलचा दैविक वाघेला, न्यू इंग्लिश स्कूल-जैतापूरचा आर्यन राऊत, पोद्दार हायस्कूल-मालाडचा प्रसन्न गोळे यांनी सलामीचे सामने जिंकले. सरळ जाणाऱ्या सोंगट्यांचे सातत्य राखत गौरी सावंतने सुळे गुरुजी सेकंडरी स्कूलच्या ग्रीष्मा धामणकरचा १४-५ असा पराभव करून दुसऱ्या फेरीत प्रवेश केला.

विविध जिल्ह्यातील ३२ खेळाडूंमध्ये सुरु झालेल्या आरएमएमएस सभागृहामधील स्पर्धेत पाटकर विद्यालय-डोंबिवलीचा नील म्हात्रे विरुध्द मायकल हायस्कूल-कुर्ल्याचा निखील भोसले यामधील लढत एकतर्फी झाली. सुरुवातीचे दोन बोर्ड हातचे निसटल्यामुळे दबावाखाली खेळणाऱ्या निखील भोसलेला नील म्हात्रेने १५-४ असे नमविले. अन्य सामन्यात दैविक वाघेलाने दुर्वेश चव्हाणवर २५-० असा, आर्यन राऊतने आरव आंजर्लेकरबर २५-० असा, प्रसन्न गोळेने अनय म्हेत्रेवर २३-२ असा तर तनया दळवीने वेदिका पोमेंडकरवर १२-८ असा विजय मिळविला. क्रीडापटू गोविंदराव मोहिते, माजी नगरसेवक सुनील अहिर, संजय कदम, बजरंग चव्हाण, सुनील बोरकर, शिवछत्रपती पुरस्कार विजेते लीलाधर चव्हाण आदींच्या प्रमुख उपस्थितीत स्पर्धेचे शानदार उद्घाटन झाले.