मुंबईच्या एक्वा लाईन मेट्रो स्टेशन मार्गावर नेटवर्क ब्लॅकआऊटमुळे प्रवाशांचा जीव टांगणीवर तर सरकार मात्र साखर झोपेत

POSTED BY : MRUNALI SAKPAL DT. 19/03/2026 📞  8850212023

मुंबई NHI24.COM(M) : मुंबईच्या महत्त्वाकांक्षी मेट्रो-३ (अक्वा लाईन) प्रकल्पात मोबाईल नेटवर्कचा गंभीर अभाव समोर आला असून, भुयारी मार्गांमध्ये पूर्णपणे कनेक्टिव्हिटी खंडित होत आहे. यामुळे लाखो प्रवासी प्रवासादरम्यान अत्यावश्यक संपर्क साधण्यापासून वंचित राहत असून, शहरी पायाभूत नियोजनावर गंभीर प्रश्न उपस्थित होत आहेत. मुंबईच्या एक्वा लाईन मेट्रो स्टेशन मार्गावर नेटवर्क ब्लॅकआऊट आपातकालीन घटनेच्यावेळी कोणत्याही नेटवर्क उपलब्ध नसणार त्यामुळे प्रवाशांचा जीव टांगणीवर तर सरकार मात्र विकास नावाच्या साखर झोपेत असणार.

मार्गावरील २७ पैकी तब्बल २६ स्थानके भुयारी असल्याने सीप्झ ते कफ परेडदरम्यान प्रवाशांना बोगदे आणि स्थानकांमध्ये मोबाईल नेटवर्क पूर्णपणे गायब होत आहे. परिणामी, कॉल, मेसेज किंवा इंटरनेट सेवा उपलब्ध नसल्याने प्रवासी अक्षरशः ‘डिस्कनेक्ट’अवस्थेत प्रवास करत आहेत.

ही समस्या मेट्रो मार्गावर उपलब्ध असलेल्या सामायिक दूरसंचार पायाभूत सुविधांच्या (एसीईएस इंडिया) बंद झाल्यानंतर निर्माण झाली आहे. बदललेल्या नियामक चौकटी आणि ‘राइट ऑफ वे’ नियमांतील बदलांमुळे पूर्वीची व्यवस्था धोक्यात आली असून, ती पूर्णपणे विस्कळीत होण्याची शक्यता आहे. नव्याने नेटवर्क उभारण्यासाठी साधारणतः ६ ते १२ महिन्यांचा कालावधी लागू शकतो, अशी माहिती समोर येत आहे.

भुयारी मेट्रोमध्ये मोबाईल नेटवर्क नसणे ही केवळ गैरसोय नसून, ती थेट प्रवाशांच्या सुरक्षेशी संबंधित बाब ठरत आहे. आपत्कालीन परिस्थितीत संपर्क साधण्याची कोणतीही सुविधा नसल्याने महिला, ज्येष्ठ नागरिक आणि विद्यार्थ्यांच्या सुरक्षिततेबाबत गंभीर चिंता व्यक्त केली जात आहे.

जागतिक स्तरावर लंडन अंडरग्राउंड, दुबई मेट्रो तसेच दिल्ली मेट्रोमध्ये भुयारी मार्गांवर अखंड मोबाईल सेवा ही मूलभूत सुविधा मानली जाते. त्याच्या तुलनेत मुंबईच्या प्रमुख मेट्रो मार्गावर अशी सुविधा उपलब्ध नसणे, ही मोठी तफावत मानली जात आहे.

दररोज सुमारे १३ लाख प्रवासी वाहून नेण्याची क्षमता असलेली मेट्रो-३ ही दक्षिण मुंबई ते उपनगरांना जोडणारी महत्त्वाची वाहतूक कडी आहे. मात्र, कनेक्टिव्हिटीच्या समस्येमुळे प्रवाशांचा विश्वास कमी होण्याची शक्यता व्यक्त होत आहे.

सध्या तरी मोबाईल नेटवर्क पुन्हा सुरू होण्याबाबत कोणतीही स्पष्ट वेळमर्यादा जाहीर करण्यात आलेली नाही. त्यामुळे धोरणात्मक बदल आणि अंमलबजावणीतील विसंगतींचा थेट परिणाम प्रवाशांवर होत असल्याचे स्पष्ट होत आहे.

मुंबईसारख्या महानगरात वाहतूक व्यवस्थेसोबतच दूरसंचार सुविधा ही देखील अत्यावश्यक सेवा बनली आहे. त्यामुळे मेट्रो-३ मार्गावर मोबाईल कनेक्टिव्हिटी तातडीने पुनर्स्थापित करणे ही आता अत्यावश्यक गरज बनली असून, प्रवाशांच्या सुरक्षितता, विश्वास आणि सोयीसाठी त्वरित पावले उचलण्याची आवश्यकता आहे.