चिन्मय मिशनच्या ७५ व्या वर्षपूर्ती निमित्त ‘चिन्मय अमृत यात्रा’ मुंबईत दाखल

POSTED BY : MRUNALI SAKPAL DT. 05/02/2026 📞  8850212023

मुंबई NHI24.COM(M) : चिन्मय अमृत महोत्सवांतर्गत सुरू झालेली ही देशव्यापी आध्यात्मिक यात्रा भारत, नेपाळ आणि श्रीलंका या देशांमधून ३५,००० किलोमीटरहून अधिक प्रवास करणार आहे.

मुंबई, ३ फेब्रुवारी २०२६: चिन्मय अमृत महोत्सवाच्या अंतर्गत, चिन्मय मिशनच्या ७५ वर्षांच्या उत्सवाचा भाग म्हणून ‘चिन्मय अमृत यात्रा’ मुंबईत दाखल झाली.  या यात्रेच्या आगमनाने मुंबईकरांनी एका सखोल आध्यात्मिक क्षणाचा अनुभव घेतला. पूज्य गुरुदेव स्वामी चिन्मयानंद यांचा वारसा लाभलेली ही यात्रा आपल्यासोबत पवित्र वस्तू, दुर्मिळ संग्रहित ठेवा आणि वेदांताचे शाश्वत ज्ञान घेऊन आली आहे.

जागतिक प्रमुख पूज्य स्वामी स्वरूपानंद यांच्या मार्गदर्शनाखाली तसेच मिशनचे माजी जागतिक प्रमुख पूज्य स्वामी तेजोमयानंद यांच्या सान्निध्यात मुंबईत यात्रेचे स्वागत करण्यात आले. या स्वागत सोहळ्याने चिन्मय मिशनच्या वर्षभर चालणाऱ्या स्मृतियात्रेतील एक महत्त्वपूर्ण टप्पा गाठल्याचे अधोरेखित केले.

‘चिन्मय अमृत यात्रा’ ही २९५ दिवसांची एक राष्ट्रीय आणि आंतरराष्ट्रीय आध्यात्मिक यात्रा आहे. या यात्रेचा प्रारंभ ३१ डिसेंबर २०२५ रोजी पुणे येथील ‘चिन्मय विभूती’तून झाला असून, २३ ऑक्टोबर २०२६ रोजी नवी दिल्लीतील ‘भारत मंडपम’ येथे तिचा समारोप होईल. सुमारे ३५,००० किलोमीटरचा टप्पा पार करणारी ही यात्रा भारतातील प्रमुख प्रदेशांमधून प्रवास करणार आहे. इतकेच नव्हे तर, नेपाळ आणि श्रीलंका या देशांमध्येही ही यात्रा आपला प्रवास विस्तारणार असून, याद्वारे वेदांताच्या ज्ञानाची वैश्विक प्रासंगिकता संस्कृती आणि सीमांच्या पलीकडे अधिक दृढ केली जाणार आहे.

या यात्रेचा मुख्य आध्यात्मिक आधारस्तंभ म्हणजे ‘डिजिटल यज्ञ’. यामध्ये पूज्य गुरुदेव स्वामी चिन्मयानंद यांच्या निवडक प्रवचनांचा संग्रह असून, तो प्रादेशिक भाषांमधील उपशीर्षके (subtitles) आणि आवाजासह उपलब्ध करून देण्यात आला आहे. यामुळे अभ्यासकांना, विशेषतः तरुणांना आणि प्रथमच हे ज्ञान घेणाऱ्या श्रोत्यांना भगवद्गीतेच्या शिकवणुकीशी अर्थपूर्णरित्या जोडले जाणे आणि गुरुदेवांच्या शाश्वत मार्गदर्शनाचा सखोल अनुभव घेणे शक्य होणार आहे.

तसेच, या यात्रेचे खास वैशिष्ट्य म्हणजे विशेषरित्या तयार केलेली ‘चिन्मय वाहिनी’ (फिरते प्रदर्शन), जी पूज्य गुरुदेव स्वामी चिन्मयानंद यांचे जीवन आणि त्यांच्या शिकवणुकीचा एक तल्लीन करणारा अनुभव भाविकांना प्रदान करते. या वाहिनीमध्ये गुरुदेवांच्या अत्यंत वैयक्तिक आणि पवित्र वस्तू जतन करण्यात आल्या आहेत, ज्यामध्ये त्यांच्या पूजनीय पादुका, वस्त्रे आणि त्यांनी प्रत्यक्ष वापरलेल्या इतर मौल्यवान वस्तूंचा समावेश आहे. त्यासोबतच, गुरुदेवांचा आध्यात्मिक वारसा जिवंत करणारी विचारपूर्वक मांडलेली प्रदर्शनेही यात आहेत. या सर्व घटकांमुळे प्रत्येक ठिकाणी सामूहिक प्रार्थना, चिंतन आणि अध्ययनासाठी एक पवित्र आणि प्रसन्न वातावरण निर्माण होते. पादुका पूजन, संवादात्मक सत्रे आणि समाजाभिमुख उपक्रम यांच्या सहवासात ही यात्रा कालातीत आध्यात्मिक ज्ञानाचे दैनंदिन जीवनातील आचरणात रूपांतर करण्याच्या चिन्मय मिशनच्या ध्येयाला अधिक बळ देते. विशेषतः युवकांमध्ये स्पष्टता, ध्येयदृष्टी आणि मूल्याधिष्ठित जीवनशैली यांची प्रेरणा जागृत करण्यावर यात्रेचा विशेष भर आहे.

मुंबईतील मुक्कामादरम्यान, ही यात्रा एका चैतन्यमय आध्यात्मिक मिरवणुकीच्या रूपात पाहायला मिळाली, ज्यामध्ये औपचारिक ताफा, सामूहिक प्रार्थना, भजने आणि सेवा कार्यांचा समावेश होता. विविध पार्श्वभूमीतून आलेले ‘युवावीर’ (स्वयंसेवक) या यात्रेसोबत आहेत. यातील अनेक तरुणांनी जवळपास ३०० दिवसांच्या या प्रवासात ‘वाहिनी’सोबत संपूर्ण देशभर प्रवास करण्याचा पवित्र संकल्प केला आहे. पूज्य गुरुदेव स्वामी चिन्मयानंद यांच्या चरणी ‘सेवा’ म्हणून हे आव्हान स्वीकारणारे हे युवावीर मिशनच्या युवा सक्षमीकरण, शिस्त, एकता आणि निस्वार्थ सेवेच्या मूल्यांचे जिवंत उदाहरण आहेत; ते प्रत्येक पाऊलावर या यात्रेचा आत्मा आणि संदेश पुढे नेत आहेत.

मुंबईतील या सोहळ्याला हिरानंदानी समूहाचे सीईओ श्रीधर नारायण; एल अँड टी (L&T) एम्प्लॉयी ट्रस्टचे विश्वस्त जयंत पाटील; अँबिट प्रायव्हेट लिमिटेडचे ग्रुप सीईओ अशोक वाधवा आणि हिंदुस्थान युनिलिव्हर लिमिटेडचे अध्यक्ष नितीन परांजपे यांनी उपस्थिती लावली. त्यांनी भक्त आणि स्वयंसेवकांसोबत या यात्रेचा आध्यात्मिक एकता आणि प्रबोधनाचा संदेश अनुभवला.

ही यात्रा स्वामी अनुकूलानंद यांच्या आशीर्वाद आणि नेतृत्वाखाली आयोजित केली जात आहे. मुंबईतील कार्यक्रमात उपस्थितांना संबोधित करताना ते म्हणाले, “चिन्मय अमृत यात्रेचा मुख्य उद्देश देशातील तरुणांपर्यंत पोहोचणे आणि त्यांना भगवद्गीतेच्या ज्ञानाशी एका अर्थपूर्ण संवादात सहभागी करून घेणे हा आहे. ‘गीता पंचामृत’ या संकल्पनेवर आधारित ही यात्रा गीतेची शाश्वत शिकवण अनुभवात्मक, प्रासंगिक आणि दैनंदिन जीवनाशी निगडित अशा स्वरूपात सादर करते. विविध प्रदेश आणि संस्कृतींमधून प्रवास करताना, ही यात्रा विचारांची स्पष्टता, चारित्र्यनिर्मिती आणि जीवनाचा सखोल उद्देश जोपासण्याचा प्रयत्न करते, जेणेकरून हे ज्ञान जबाबदार कृतीतून नैसर्गिकरित्या प्रकट होईल.”

 यात्रेचे महत्त्व अधोरेखित करताना पूज्य स्वामी स्वरूपानंद म्हणाले, “चिन्मय अमृत यात्रा ही पूज्य गुरुदेव स्वामी चिन्मयानंद यांच्या आध्यात्मिक ज्ञान संस्थांच्या चौकटीपलीकडे नेऊन लोकांच्या जीवनात रुजवण्याच्या दृष्टीकोनाचे प्रतिबिंब आहे. देशभर चालणारा हा प्रवास केवळ भौतिक हालचाल नसून, अंतर्मनातील जागरूकता, जीवनातील उद्देश आणि मूल्यांची सामूहिक जागृती आहे. ही यात्रा विविध शहरे आणि समुदायांतून प्रवास करत असताना, भगवद्गीतेचे उपदेश आजच्या आधुनिक जीवनालाही संतुलन, सामर्थ्य आणि करुणेने मार्गदर्शन करत आहेत, याची पुनःप्रचिती देते.”

चिन्मय मिशन आपल्या स्थापनेची ७५ वर्षे साजरी करत असताना, ‘चिन्मय अमृत यात्रा’ ही कृतज्ञता, सातत्य आणि नवचैतन्याची एक सामूहिक अभिव्यक्ती ठरली आहे. भौगोलिक सीमा ओलांडणारा हा प्रवास आता एका सामायिक आध्यात्मिक चळवळीचे रूप घेत आहे, जी स्थानिक आवाज, स्थानिक भाषा आणि जनसहभागाच्या माध्यमातून पुढे नेली जात आहे.

‘चिन्मय अमृत यात्रे’चा समारोप २३ ते २५ ऑक्टोबर २०२६ या कालावधीत नवी दिल्लीतील ‘भारत मंडपम’ येथे आयोजित तीन दिवसांच्या राष्ट्रीय संमेलनाने होईल. या ऐतिहासिक आध्यात्मिक प्रवासाची सांगता करण्यासाठी भारतभरातील आणि परदेशातील भाविक व प्रतिनिधी या ठिकाणी एकत्र येतील.