7PADEL MS DHONI आणि PADELPARK INDIA यांचे विलीनीकरण

POSTED BY : MRUNALI SAKPAL DT. 03/01/2026 📞  8850212023

भारतामध्ये पॅडेल खेळाच्या वाढीस गती देण्यासाठी राष्ट्रीय स्तरावर एकत्रित व्यासपीठाची निर्मिती

MUMBAI RMN.IN(E): भारतीय क्रीडाविश्वासाठी एक महत्त्वाचा टप्पा ठरवत, क्रिकेटमधील दिग्गज महेंद्रसिंग धोनी यांनी पॅडेल खेळातील आपली भागीदारी अधिक मजबूत करत ‘7Padel MS Dhoni’ आणि भारतातील आघाडीची पॅडेल इकोसिस्टीम ‘PadelPark India’ यांचे विलीनीकरण जाहीर केले आहे.

या विलीनीकरणामुळे पॅडेल खेळासाठी एक राष्ट्रीय स्तरावरील एकसंध व्यासपीठ उभे राहत असून, यामधून जलद विस्तार, सशक्त समुदाय सहभाग आणि अधिक व्यावसायिक पद्धतीने रचलेली स्पर्धात्मक संरचना उभारण्याचा उद्देश आहे. पॅडेल हा सध्या भारतातील सर्वात वेगाने वाढणाऱ्या क्रीडाप्रकारांपैकी एक ठरत आहे.

ऑगस्ट 2024 पासून, JSW Sports चे संस्थापक आणि देशातील विविध क्रीडाप्रकारांना प्रोत्साहन देणारे आघाडीचे उद्योगपती पार्थ जिंदाल हे PadelPark India मधील सुरुवातीच्या गुंतवणूकदारांपैकी एक आहेत. आता महेंद्रसिंग धोनी हे या विलीनीत संस्थेमध्ये भागीदार म्हणून सहभागी होत असल्याने, या प्लॅटफॉर्मवरील संस्थात्मक विश्वास अधिक दृढ होणार असून भारतातील पॅडेल खेळाच्या पुढील टप्प्यातील विस्तारासाठी हा एक निर्णायक घटक ठरणार आहे.

 महेंद्रसिंग धोनी, भागीदार – PadelPark India म्हणाले, “भारतामध्ये 1 कोटींपेक्षा अधिक रॅकेट क्रीडाप्रेमी आहेत आणि टियर-1 शहरांमध्ये पॅडेल किती वेगाने लोकप्रिय होऊ शकतो हे आपण आधीच पाहिले आहे. आता हीच गती नव्या बाजारपेठांमध्ये नेणे आणि मेट्रो शहरांबाहेरही हा खेळ सर्वसामान्यांपर्यंत पोहोचवणे हे पुढील पाऊल आहे. एकदा कोर्ट्स उपलब्ध झाले की लोक आपोआप या खेळाकडे वळतात. पॅडेल हा सामाजिक खेळ आहे, डबल्समध्ये खेळला जातो आणि समुदायाभोवती केंद्रित आहे, जे भारतीय संस्कृतीला अगदी साजेसे आहे. PadelPark India च्या 360 अंशांच्या इकोसिस्टीममुळे कोर्ट्स, कोचिंग, स्पर्धा आणि समुदाय उपक्रमांच्या माध्यमातून आपण संपूर्ण देशभरात सातत्याने आणि व्यावसायिक पद्धतीने पॅडेलचा विस्तार करू शकतो.”

निखिल सचदेव, सह-संस्थापक – PadelPark India म्हणाले, “हे विलीनीकरण केवळ एक भागीदारी नाही, तर भारतात पॅडेल कसा वाढायला हवा याविषयीची सामायिक दृष्टी आहे. 7Padel MS Dhoni आणि PadelPark India यांना एकत्र आणल्याने एक असे एकसंध व्यासपीठ तयार झाले आहे, जे दर्जा उंचावू शकते, सहभाग वाढवू शकते आणि खेळासाठी दीर्घकालीन विश्वासार्हता निर्माण करू शकते. धोनी यांचे नेतृत्व, मूल्यव्यवस्था आणि स्पष्ट विचारसरणी आमच्या ध्येयाला मोठी ताकद देतात. आता आमच्याकडे रचना, दृष्टी आणि गती – तिन्ही आहेत, ज्यामुळे भारतातील पॅडेल खेळाचे भविष्य निश्चित करता येईल.”

निखिल सचदेव, जिगर दोशी, प्रतिक दोशी आणि रोनक दफ्तारी यांनी स्थापन केलेली PadelPark India ही भारतातील सर्वात व्यापक पॅडेल इकोसिस्टीम उभारण्यात अग्रणी ठरली आहे. सध्या संस्थेकडे 40 हून अधिक स्वतःची आणि व्यवस्थापित कोर्ट्स असून, देशभरात एकूण 200 पेक्षा अधिक कोर्ट्सच्या पायाभूत सुविधांमध्ये त्यांनी योगदान दिले आहे. येत्या एका वर्षात 400 ते 500 कोर्ट्स उभारण्याचे लक्ष्य ठेवण्यात आले असून, त्यामुळे भारतभर जागतिक दर्जाच्या पॅडेल सुविधांपर्यंत पोहोच मोठ्या प्रमाणात वाढणार आहे.

आंतरराष्ट्रीय पॅडेल महासंघ (FIP) द्वारा डिसेंबर 2025 मध्ये प्रसिद्ध करण्यात आलेल्या World Padel Report 2025 नुसार, पॅडेल खेळाने जागतिक स्तरावर 150 देशांमध्ये 77,300 हून अधिक कोर्ट्सचा टप्पा ओलांडला असून, हा खेळ सातत्याने जागतिक स्तरावर विस्तारत असल्याचे स्पष्ट संकेत मिळतात.

भारतही याच गतीने पुढे जात आहे. उद्योग क्षेत्रातील आकडेवारीनुसार, 2023 मध्ये सुमारे 70 कोर्ट्सपासून सुरू झालेला पॅडेलचा प्रवास, 2024 च्या मध्यापर्यंत 100 कोर्ट्सपर्यंत पोहोचला आणि आता देशभरात 300 हून अधिक कोर्ट्स कार्यरत आहेत. यामुळे महानगरांसह उदयोन्मुख बाजारपेठांमध्येही पॅडेल खेळ झपाट्याने रुजत असल्याचे दिसून येते.

गेल्या तिमाहीत पॅडेलसाठी एक ऐतिहासिक टप्पा गाठण्यात आला. नोव्हेंबर 2025 मध्ये, आंतरराष्ट्रीय पॅडेल महासंघ (FIP) आणि त्याची खंडीय संस्था Padel Asia यांनी संयुक्तपणे जाहीर केले की, पॅडेल खेळाला ऑलिम्पिक कौन्सिल ऑफ एशिया (OCA) कडून अधिकृत मान्यता देण्यात आली असून, आगामी आशियाई क्रीडा स्पर्धांमध्ये पॅडेलचा समावेश अधिकृत क्रीडाप्रकार म्हणून करण्यात येणार आहे.

7Padel MS Dhoni आणि PadelPark India मिळून आता भारतभर पॅडेल खेळाच्या वाढीस वेग देण्यासाठी सज्ज झाले असून, हा खेळ अधिक सुलभ, समुदाय-केंद्रित आणि व्यावसायिक पद्धतीने चालवला जाणारा क्रीडाप्रकार म्हणून उभारण्याचा त्यांचा संकल्प आहे.