लार्सन अँड टुब्रो प्रस्तुत CIDCO ओपन 2025 मध्ये अंतिम फेरीतील दमदार 67 च्या जोरावर वीर अहलावत विजेता

POSTED BY : ANAGHA  SAKPAL DT. 16/12/2025 📞  9004379946

नवी मुंबई,(NHI@24.COM) : गुरुग्रामचा गोल्फपटू वीर अहलावत याने आपला अनुभव पणाला लावत लार्सन अँड टुब्रो प्रस्तुत एक कोटी रुपयांच्या CIDCO ओपन 2025 स्पर्धेत विजेतेपद पटकावले. नवी मुंबईतील खारघर व्हॅली गोल्फ कोर्स (KVGC) येथे आयोजित झालेली ही पहिलीच व्यावसायिक गोल्फ स्पर्धा होती.

वीर अहलावत (65-65-73-67) पहिल्या दोन फेऱ्यांमध्ये एकमेव आघाडीवर होता, तर तिसऱ्या फेरीनंतर संयुक्त आघाडीवर होता. अंतिम फेरीत दिवसाच्या पहिल्या टप्प्यात अडचणी आल्या तरीही त्याने चार-अंडर 67 अशी भक्कम खेळी करत एकूण 14-अंडर 270 स्कोअर करत तीन फटक्यांनी विजेतेपद निश्चित केले.

सहा फूट चार इंच उंच असलेला अहलावत हा 2024 चा PGTI ऑर्डर ऑफ मेरिट विजेता आहे. या विजयासह त्याने 2025 मधील आपले दुसरे आणि एकूण सहावे व्यावसायिक विजेतेपद मिळवले. या विजयाबद्दल त्याला 15 लाख रुपयांचे पारितोषिक मिळाले तसेच PGTI 2025 क्रमवारीत तो 18 व्या स्थानावरून थेट 11 व्या स्थानी पोहोचला.

पुण्याचा रोहन ढोले पाटील (70-69-64-70), जो वीरसोबत संयुक्त आघाडीवर होता, त्याने अंतिम फेरीत 70 फटके खेळत एकूण 11-अंडर 273 स्कोअर केला आणि उपविजेतेपद मिळवले. हा PGTI वरील त्याचा सर्वोत्तम निकाल ठरला. रोहनला 10 लाख रुपयांचे पारितोषिक मिळाले आणि तो क्रमवारीत 42 व्या स्थानावरून 32 व्या स्थानी पोहोचला.

गुरुग्रामचा मनु गांडस (68-68-70-68) आणि इटलीचा मिशेले ऑर्टोलानी (67-66-72-69) यांनी 10-अंडर 274 स्कोअरसह संयुक्त तिसरे स्थान पटकावले.

चंदीगडच्या रवी कुमारने अंतिम फेरीत 71 फटके खेळताना स्पर्धेतील तिसरा होल-इन-वन केला. त्याने 13 व्या होलवर हा पराक्रम केला. एकूण 4-अंडर 280 स्कोअर करत त्याने संयुक्त नववे स्थान मिळवले.

CIDCO म्हणजे सिटी अँड इंडस्ट्रियल डेव्हलपमेंट कॉर्पोरेशन ऑफ महाराष्ट्र लिमिटेड. CIDCO ही महाराष्ट्र शासनाची सार्वजनिक क्षेत्रातील संस्था असून तिला नवीन शहर विकास प्राधिकरण (NTDA) म्हणून अधिसूचित करण्यात आले आहे. नंतर विशेष नियोजन प्राधिकरण (SPA) म्हणून तिच्या कार्यक्षेत्राचा विस्तार करण्यात आला. आज CIDCO देशातील अग्रगण्य नगरनियोजन व विकास संस्था म्हणून ओळखली जाते.

लार्सन अँड टुब्रो (L&T) ही कंपनी भारतात व परदेशात क्रीडाविकासासाठी सक्रियपणे योगदान देत आहे. अहमदाबादमधील जगातील सर्वात मोठे क्रिकेट स्टेडियम (मोतेरा) आणि राऊरकेलामधील जगातील सर्वात मोठे हॉकी स्टेडियम यांसारखी भव्य क्रीडास्थळे उभारण्यात L&T ने महत्त्वाची भूमिका बजावली आहे. तसेच L&T ओपन (WTA टेनिस), L&T मॅरेथॉन आणि चेन्नईतील L&T ओपन गोल्फ स्पर्धेचे प्रायोजकत्व कंपनी करते.

PGTI ला Rolex, Amul, IndusInd Bank, Victorious Choice, Campa, Amrutanjan Electro Plus, Golf Plus Monthly आणि Golf Design India यांसारख्या टूर पार्टनर्सच्या सातत्यपूर्ण पाठिंब्यामुळे स्थिर वाढ साधता आली आहे.

DLF गोल्फ अँड कंट्री क्लब, गुरुग्रामचा वीर अहलावतने पहिल्या आणि तिसऱ्या होलवर टॅप-इन बर्डी करत दिवसाची सुरुवात चांगली केली. मात्र चौथ्या आणि नवव्या होलवर झाडांमध्ये व पाण्यात चेंडू गेल्याने त्याला दोन बोगी आणि एक डबल-बोगीचा सामना करावा लागला.

टर्ननंतर रोहन ढोले पाटील, मिशेले ऑर्टोलानी आणि मनु गांडस हे वीरच्या अगदी जवळ आले होते. मात्र 11 व्या होलनंतर वीरने जबरदस्त पुनरागमन करत शेवटच्या आठ होलमध्ये एक ईगल, चार बर्डी आणि केवळ एक बोगी केली. 12 व्या होलवर 20 फूटाचा ईगल पुट, 13 व्या होलवर 15 फूटाचा बर्डी पुट आणि 18 व्या होलवर 20 फूटाचा बर्डी पुट यामुळे त्याने पूर्ण नियंत्रण मिळवले.

बॅक-नाइनवर इतर खेळाडूंना वीरशी पाऊलताल ठेवणे कठीण गेले. रोहन ढोले पाटील 13 व्या होलपर्यंत एक-ओव्हरवर होता. त्यानंतर त्याने सलग तीन बर्डी केल्या, मात्र शेवटच्या होलवर बोगी झाल्याने तो तीन फटक्यांनी मागे राहिला.

DP वर्ल्ड टूरवर 2025 हंगामात खेळण्याचा आंतरराष्ट्रीय अनुभव घेतलेल्या वीर अहलावतने सांगितले,

“मी सुरुवात चांगली केली होती, पण 10 व्या होलपर्यंत काही चुका झाल्या. मात्र 11 व्या होलनंतर मी पूर्ण लयीत आलो.

मधल्या कठीण टप्प्यातही मला आत्मविश्वास होता कारण अशा तणावपूर्ण परिस्थितीत मी याआधीही चांगली कामगिरी केली आहे. एकदा माझा ‘A गेम’ बाहेर आला की मला हरवणे कठीण असते हे मला ठाऊक होते.

या स्पर्धेसाठी CIDCO आणि L&T यांचे मी आभार मानतो. खारघर व्हॅली गोल्फ कोर्सची रचना आणि लांबी पाहता तो देशातील सर्वोत्तम गोल्फ कोर्सपैकी एक आहे असे मला वाटते.”