सीएसएमव्हीएस चिल्ड्रन्स म्युझियमचा ७ वा वर्धापन दिन उत्साहात साजरा

POSTED BY : MRUNALI SAKPAL DATED ON 27/03/2026 ( 8850212023 )

छत्रपती शिवाजी महाराज वस्तुसंग्रहालय (CSMVS) तर्फे चिल्ड्रन्स म्युझियमचा ७ वा वर्धापन दिन विविध उपक्रमांनी उत्साहात साजरा करण्यात आला. या कार्यक्रमाला शालेय विद्यार्थी, लहान मुले आणि पालकांचा उत्स्फूर्त प्रतिसाद लाभला.

सकाळी ११.०० ते दुपारी ३.०० या वेळेत आयोजित या उपक्रमासाठी १५ वर्षांपर्यंतच्या मुलांसाठी विनामूल्य प्रवेश ठेवण्यात आला होता. यामधून मुलांना इतिहास, संस्कृती आणि सर्जनशीलता यांचा अनुभव प्रत्यक्ष सहभागातून घेण्याची संधी मिळाली.

या कार्यक्रमातील प्रमुख आकर्षणांपैकी स्टोन टूल डेमोन्स्ट्रेशन या उपक्रमातून मुलांना प्रागैतिहासिक काळातील साधनांची माहिती आणि त्यांचा उपयोग प्रत्यक्ष दाखविण्यात आला. कावड कथाकथन सत्रांमध्ये पारंपरिक चित्रित फलकांच्या माध्यमातून लोककथा आणि पौराणिक गोष्टी जिवंतपणे सादर करण्यात आल्या.

ट्रंक म्युझियम: शो अँड टेल या उपक्रमातून मुलांना विविध वस्तू आणि प्रतिकृती जवळून पाहण्याची आणि त्यामागील माहिती जाणून घेण्याची संधी मिळाली. तसेच, हायरोग्लिफ्स आणि क्युनिफॉर्म बुकमार्क मेकिंग या सर्जनशील उपक्रमातून मुलांना प्राचीन लेखन पद्धतींची ओळख करून देण्यात आली.

याशिवाय, विशेष तयार करण्यात आलेल्या ट्रेल्स आणि वर्कशीट्स च्या माध्यमातून मुलांनी संग्रहालयातील दालनांचा शोध घेत, निरीक्षण आणि विचारशक्ती विकसित करण्याचा अनुभव घेतला.

या उपक्रमामुळे चिल्ड्रन्स म्युझियम हे अनुभवाधारित शिक्षणासाठी एक महत्त्वाचे आणि सशक्त व्यासपीठ असल्याचे पुन्हा अधोरेखित झाले. मुलांचा उत्स्फूर्त सहभाग आणि आनंदी वातावरण यामुळे या उपक्रमाचे सात वर्षांचे यश स्पष्टपणे दिसून आले.