बजाज पुणे ग्रँड टूरला विक्रमी प्रतिसाद – आंतरराष्ट्रीय स्तरावरूनही भक्कम पाठिंबा यूसीआय २.२ शर्यतीसाठी आतापर्यंतचे सर्वांत मोठे खेळाडूंचे पथक भारतात दाखल होणार

POSTED BY : MRUNALI SAKPAL DT. 03/01/2026 📞  8850212023

पाचखंडांतील २९ आंतरराष्ट्रीय संघ आणि ३५ देशांचे सायकलपटू पुण्यात येणार;
जगातील १७१ खेळाडूंची विक्रमी नोंद

पुणे,NHI24.COM(M): पहिली ‘बजाज पुणे ग्रँड टूर २०२६’ ही पुरुषांची आंतरराष्ट्रीय सायकलिंग शर्यत नवा इतिहास घडवण्यासाठी सज्ज झाली आहे. युनियन सायकलिस्ट इंटरनॅशनलच्या (यूसीआय २.२ श्रेणी) मान्यतेखाली होणाऱ्या या शर्यतीत पाच खंडांतील ३५ देशांचे प्रतिनिधित्व करणारे २९ संघ आणि १७१ एलिट सायकलपटू सहभागी होणार आहेत. आंतरराष्ट्रीय सायकलिंग विश्वाकडून मिळालेला हा अभूतपूर्व प्रतिसाद पुण्याला जागतिक स्तरावर एक प्रमुख ‘प्रोफेशनल सायकलिंग सर्किट’ म्हणून स्थापित करत आहे. ही शर्यत १९ ते २३ जानेवारीदरम्यान होणार आहे.

पुणे जिल्हा प्रशासनाच्या पुढाकाराने आणि महाराष्ट्र सरकारच्या भक्कम पाठिंब्याने आयोजित ही पाच दिवसांची, ४३७ किलोमीटरची शर्यत असून, यात एक ‘प्रोलॉग’ (सुरुवातीचा आठ किलोमीटरचा छोटा टप्पा) आणि चार प्रमुख टप्प्यांचा समावेश आहे. या शर्यतीदरम्यान सायकलपटू पुण्याच्या ऐतिहासिक स्थळांपासून ते दख्खनच्या पठारावरील आव्हानात्मक घाटांपर्यंत विविध भूप्रदेशांतून वाटचाल करतील.

या शर्यतीत फ्रान्स, ग्रेट ब्रिटन, बेल्जियम, जर्मनी, नेदरलँड्स, ऑस्ट्रेलिया, चीन आणि थायलंडसारख्या दिग्गज सायकलिंग राष्ट्रांचे संघ सहभागी होणार आहेत. खंडांनुसार पाहता, आशियातून सर्वाधिक ७८ खेळाडू, युरोपमधून ६९, ओशनियामधून १२, अमेरिकेतून ६ आणि आफ्रिकेतून ६ खेळाडू पुण्यात दाखल होणार आहेत.

नवे मापदंड प्रस्थापित

सामान्यतः यूसीआय २.२ श्रेणीतील शर्यतींमध्ये जास्तीत जास्त १२५ सायकलपटू सहभागी असतात. मात्र, बजाज पुणे ग्रँड टूरने १७१ स्पर्धकांसह नवा जागतिक विक्रम प्रस्थापित केला आहे. यामध्ये ओडिशामध्ये झालेल्या राष्ट्रीय अजिंक्यपद स्पर्धेतून निवडलेल्या सहा भारतीय सायकलपटूंच्या संघाचाही समावेश आहे.

अधिकाऱ्यांची प्रतिक्रिया

पुणे जिल्हाधिकारी आणि या दौऱ्याचे प्रभारी अधिकारी श्री. जितेंद्र दुडी म्हणाले, “पुणे आणि भारतासाठी हा एक ऐतिहासिक क्षण आहे. आम्ही जागतिक दर्जाची शर्यत आयोजित करण्यासाठी पूर्णपणे सज्ज आहोत. ही केवळ एक स्पर्धा नसून, या निमित्ताने व्यावसायिक सायकलिंगच्या जगात भारताचा उदय होणार आहे. पुण्याला एकेकाळी सायकलिंगचे शहर म्हणून ओळखले जात होते. ही जुनी ओळख पुन्हा मिळवून देताना आम्हाला अभिमान वाटतो. १२० वर्षांचा वारसा असलेल्या ‘टूर डी फ्रान्स’ या शर्यतीकडून आम्ही प्रेरणा घेतली आहे.”

शर्यतीचे तांत्रिक संचालक श्री. पिनाकी बसाक म्हणाले, “यूसीआय २.२ श्रेणीत १७१ खेळाडूंचा सहभाग असणे हे अभूतपूर्व आहे. पहिल्याच वर्षी भारताने हे साध्य करणे ही जागतिक सायकलिंगसाठी मोठी घटना आहे. पुण्याचा आव्हानात्मक भूप्रदेश आणि जिल्हा प्रशासनाने विक्रमी वेळेत उभारलेल्या आंतरराष्ट्रीय दर्जाच्या सोयीसुविधांमुळे हे शक्य झाले आहे.”

चार टप्पे, एक मोठे आव्हान

४३७ किलोमीटरची ही शर्यत पुण्याच्या शहरी भागातून तसेच सह्याद्रीच्या पायथ्यापर्यंत नेण्यात आली आहे. यात गुडलक चौक ते डेक्कन बस स्टॉपदरम्यानचा आठ किलोमीटरचा प्रोलॉग असेल.

• टप्पा १ : मुळशी–मावळ माइल्स (९१.८ किमी)
  हिंजवडी आयटी हबमधून जाणारा हा टप्पा वेग आणि शहरी वळणांची कसोटी पाहणारा असेल.
• टप्पा २ : मराठा हेरिटेज सर्किट (१०९.१५ किमी)
  पुरंदर किल्ला, सिंहगड आणि खडकवासला परिसरातील कठीण घाट व चढण्या खेळाडूंच्या सहनशक्तीची परीक्षा घेतील.
• टप्पा ३ : पश्चिम घाट गेटवे (१३७.०७ किमी)
  सासवड ते बारामतीदरम्यानचा हा टप्पा सपाट भूप्रदेश आणि वेगवान सायकलिंगसाठी ओळखला जाईल.
• टप्पा ४ : पुणे प्राइड लूप (९९.१५ किमी)
  अंतिम टप्पा पुणे शहराच्या मध्यभागातून, शनिवारवाड्यासारख्या ऐतिहासिक स्थळांजवळून जात, शहराच्या मध्यवर्ती ठिकाणी संपन्न होईल.

बजाज पुणे ग्रँड टूर २०२६ हा भारतीय क्रीडा क्षेत्रासाठी एक निर्णायक क्षण ठरणार असून, या शर्यतीकडे संपूर्ण जगाचे लक्ष लागून आहे.